EC Ma Ndryshe ka organizuar shfaqjen e një filmi dokumentar mjedisor në Këndin Amerikan në Prizren, me pjesëmarrjen e nxënësve të shkollave të mesme të ulëta “Naim Frashëri” nga Vlashnja dhe “Emin Duraku” nga Prizreni.

Aktiviteti është shoqëruar me diskutime mbi efektet e ndryshimeve klimatike, ndikimin e tyre në ekosisteme dhe masat që komuniteti mund të ndërmarrë për mbrojtjen e mjedisit.

Në aktivitetin ndërgjegjësues fillimisht është projektuar dokumentari frymëzues mbi planetin dhe sfidat që ndikojnë në ndryshimet klimatike. Pas shfaqjes, ambientalisti Naser Bresa udhëhoqi një bisedë me nxënësit, duke e vendosur temën në kontekst lokal. Pjesëmarrësit patën mundësi të ndajnë mendimet e tyre, të parashtrojnë pyetje dhe të fitojnë njohuri të reja.

Në diskutime u theksua rëndësia e edukimit, angazhimit qytetar dhe politikave të qëndrueshme si mjete kyçe për mbrojtjen e ekosistemeve dhe përballjen me sfidat klimatike. Ky aktivitet shërbeu si një platformë ndërgjegjësimi dhe frymëzimi për veprime konkrete që mund të kontribuojnë në mbrojtjen e mjedisit.