EC Ma Ndryshe ka shënuar Ditën Botërore të Bletëve me dy aktiviteteve edukative dhe ndërgjegjësuese të realizuara në Prishtinë dhe në Prizren.

Në kopshtin e fëmijëve "Cicërimat" në Prishtinë u mbajt aktiviteti dedikuar fëmijëve parashkollorë, ku përmes prezantimeve është theksuar rëndësia e bletëve për biodiversitetin dhe ekuilibrin mjedisor. Po ashtu, janë shpjeguar sfidat aktuale mjedisore dhe mënyrat e kujdesit ndaj natyrës. Aktiviteti është përmbyllur me vendosjen e një hoteli për insekte në oborrin e kopshtit, si një hap konkret drejt mbrojtjes së natyrës dhe promovimit të biodiversitetit.

Ndërkaq, në shkollën e mesme të ulët "Gani Saramati" në Prizren është vendosur një hotel për insekte dhe më pastaj është organizuar vizita me karakter edukativ për nxënësit e kësaj shkolle në një bletore. Gjatë kësaj vizite, nxënësit janë informuar për bletët dhe rolin e tyre në ruajtjen e ekosistemit.
Të dyja aktivitetet janë zhvilluar si rezultat i bashkëpunimit dhe ideve të përbashkëta gjatë takimeve me përfaqësuesit e institucioneve edukative arsimore. Përmes këtyre nismave, EC synon të rrisë ndërgjegjësimin për rëndësinë e mbrojtjes së mjedisit dhe biodiversitetit.