Ballina

Organizata Jo-Qeveritare “Emancipimi Civil Ma Ndryshe” (EC Ma Ndryshe) është formuar nga një grup të rinjsh të profileve të ndryshme me përvojë të gjatë në sektorin e OJQ-ve, si në Kosovë ashtu edhe jashtë saj. Qëllimet kryesore të organizatës janë: promovimi i qytetarisë aktive dhe pjesëmarrëse, ngritja e vetëdijes qytetare për mbrojtjen dhe kultivimin e trashëgimisë kulturore, avancimi i pozitës së rinisë në proceset vendim-marrëse, promovimi i drejtësisë sociale dhe kontribuimi në proceset e integrimit të Kosovës në strukturat evropiane nëpërmjet vlerave kulturore, shoqërore, qytetare dhe politike të vendit tonë. Programi i punës, fushat e veprimtarisë dhe angazhimi në projekte konkrete nuk ndikohen nga asnjë strukturë e jashtme, por caktohen duke u bazuar në nevojat, brengat dhe proceset shoqërore në të cilat kalon vendi ynë, e posaçërisht rinia.

OJQ “EC Ma Ndryshe” ka dhe është duke krijuar raporte bashkëpunimi me të gjitha strukturat jo-qeveritare dhe institucionale në Kosovë, të cilat ndajnë fusha të përafërta veprimi, por edhe kompani private të cilat kanë mundësi që nëpërmjet aktivitetit të tyre të ndihmojnë në realizimin e qëllimeve të organizatës, të përshkruara më lart. Stafi aktual i organizatës përbëhet nga 14 anëtarë zyrtarë dhe 10 vullnetarë, por edhe një numër i konsiderueshëm bashkëpunëtorësh të jashtëm, të cilët mbulojnë të gjitha fushat e aktiviteteve të parapara me statut.